கொடைக்கானல்:
மலைகளின் இளவரசி என அழைக்கப்படும் கொடைக்கானலில் ஆண்டு முழுவதும் இதமான சீசன் நிலவி வருகிறது. இதனால்தான் பல்வேறு பகுதிகளில் இருந்து சுற்றுலா பயணிகள் வந்த வண்ணம் உள்ளனர்.
தற்போது காலை நேரத்தில் கடும் உறைபனியும், மதிய நேரத்தில் இதமான தட்பவெப்பதன்மை உள்ளது. கடும் பனி காரணமாக புல் பூண்டுகள் மற்றும் அரியவகை மரங்கள் கருகி வருகிறது.
இதனிடையே நேற்று இரவு செண்பகனூர் அருகே வெள்ளப்பாறை என்ற இடத்தில் உள்ள வனப்பகுதியில் திடீரென தீ பிடித்தது. காற்று வேகமாக வீசியதால் நெருப்பு மற்ற இடங்களில் கொளுந்துவிட்டு எரிய தொடங்கியது. இதனால் தீ ஜூவாலை விண்ணைத்தொடும் அளவுக்கு எழும்பியது.
பல மணிநேரமாக நெருப்பு எரிந்து கொண்டே இருந்ததால் மலைப்பகுதியில் உள்ள அரியவகை மரங்கள் எரிந்து நாசமானது.
கஜா புயல் காரணமாக மரங்கள் வேரோடு சாய்ந்து காய்ந்து கிடக்கிறது. இதில் எளிதாக தீப்பற்றியதால் மற்ற இடங்களுக்கும் தீ பரவி வருகிறது. தொடர்ந்து தீ பரவி வருவதால் வனப்பகுதியில் உள்ள விலங்குகள் ஊருக்குள் புகும் அபாயம் ஏற்பட்டுள்ளது. தகவல் அறிந்த வனத்துறை, தீயணைப்புத்துறையினர், பேத்துப்பாறை, வெள்ளப்பாறை மற்றும் மலை கிராம மக்களுடன் தீயை அணைக்கும் முயற்சியில் ஈடுபட்டு வருகின்றனர். #Kodaikanal #Forestfire
